利物浦發噩夢俾侯城屈死

2013-12-03 08:13:33 来源:互联网

利物浦發噩夢俾侯城屈死

利物浦2014年嘅月曆推出喇!但令人意外嘅係3款都冇蘇亞雷斯個樣,呢位烏拉圭前鋒喺冬季轉會窗走人似乎有跡可尋,而紅軍球迷同日仲有另一項打擊,就係球隊作客升班馬侯城爆冷輸1:3,睇嚟班頓羅渣士嘅青春革命仲未成形。
利記今仗除咗踢得麻麻之外,幸運之神遠離佢哋亦係輸波主因,積基李華摩亞喺20分鐘一次邊走邊射,個波省中史卡迪爾再笠過米洛列特手頂入網,幫主場嘅侯城領先1:0,雖然神奇隊長謝拉特喺27分鐘施展百步穿揚射入靚罰球,半場前將比數改寫成為1:1,但係利物浦嘅噩夢喺換邊後先至正式開始,72分鐘大衛美拿把握門前混戰機會,再一次為侯城領先2:1,完場前3分鐘史卡迪爾將對手嘅射門誤頂入網擺烏龍,利物浦埋單輸1:3完場,賽果同天氣一樣咁冷。


新年月曆蘇亞雷斯冇份
賽後紅軍教頭羅渣士抱怨球隊兵源不足,喺史杜列治受傷之後,搵唔到拍擋同蘇亞雷斯合組前鋒線,強調冬季轉會窗重開之後,首要任務係搵射手,不過屆時羅渣士可能要搵兩個先至夠,因為喺利物浦最新推出嘅3款2014年月曆當中,蘇亞雷斯竟然冇出現喺封面,相反佐敦軒達臣同埋米洛列特都有,多份英國報章已預言呢位烏拉圭國腳嚟緊走硬,呢鋪確係雙重打擊。

 

流言情报
相关标签: 利物浦 侯城