窮則變?變則通 摩法幻影車仔反勝

2013-12-03 08:10:52 来源:互联网

窮則變?變則通 摩法幻影車仔反勝


窮則變、變則通,摩連奴將呢句中國諺語活生生呈現喺大家眼前,當佢麾下嘅車路士喺13秒就意外失守之後,狂人下半場連續3個調動就妙手回春,最終協助藍軍以3:1反勝修咸頓,繼續保持自己創下嘅67場英超主場不敗紀錄。

摩連奴爆冷俾艾辛打正選,點知佢嘅愛將開波13秒就誤傳,直接助攻俾積洛迪古斯射成1:0,今季頻頻做巨人殺手嘅修咸頓真係嚇到史丹福橋嘅球迷面青口唇白,賽後狂人話自己當然好似俾人插咗一切,愕然到唔識反應,但強調會原諒艾辛,因為佢深知每一個人都會犯錯。


艾辛犯錯開波13秒失守
不過原諒還原諒,摩連奴下半場一開波已經因應戰術需要換走艾辛,改用丹巴巴亞入替,俾呢位塞內加爾球員同費蘭度托利斯合拍雙箭頭狂攻修咸頓,結果等到55分鐘就有回報,加利卡希爾助攻補中成1:1。騰晒雞嘅修咸頓禍不單行,正選門將保路錫受傷由加沙寧加入替,但後者落場只係幾分鐘就失守,今次輪到另一位中堅泰利發威,幫車路士頂成2:1反超前。
唔講你唔知,今場波係泰利第400次場英超比賽,呢項壯舉歷來得6個人做到,其中3個係曼聯嘅傑斯、史高斯同埋加利尼維利,另外2位分別係利物浦嘅加歷查同埋藍軍成員林柏特,而家泰利做埋歷史第7人,有埋入波更加圓滿,須知道佢早幾日先接到祖父離世噩耗,咁快可以收拾心情,果然有車路士隊長嘅風範。
藍軍埋單成3:1嗰球就喺完場前出現,後備上陣嘅丹巴巴亞門前鏟射建功,只見摩連奴興奮到衝去後備席最上排搵親生仔熱情相擁,咁又難怪佢咁開心嘅,一來佢自己保持嘅英超主場不敗紀錄增加到67場,二來佢換邊後3個調動全部有直接作用,至於罕有地踢足90分鐘嘅桑馬達亦有良好發揮,位列聯賽榜第2嘅車仔呢晚大豐收啦!

流言情报
相关标签: 車路士 修咸頓